KAN’AKIAG HETA

Nonoj la ‘ua’ua’äk se hanis fuamamau ‘on ‘Aitu ‘e a’vavhian ne la pò la Puk Resön  hete’is la pô la pan hoi’äk ‘e fau te’.

‘Un’ua’äk tape’ma se ‘on hanisi ne sai’äk ‘os mauri ‘e ‘af’af raksa’ te’, Covid-19 ne a’noanoa mäür ma’oi ‘e laloag ne faut ne väh se’. ‘Is a’häe’akiof ‘os kainag ma’oi, ma ö’ö’ mamfua ne ‘oris mauri päreafua hün se ‘af’af te’is (ma ta ‘af’af hoiäk).

‘Aitu la a’fürmaria huag ‘on kainag ne rou se’. ‘Os huga ru ti’ pau ‘e reko pelut ne sok ‘e Ukraine hün se maür ne mao, mäür ne kaunohoag ne väe vahia. ‘E reko pel te’is, ma ‘on noanoa ti’ut sokoan se rán te’ ‘atakoa hün se lamlam ne tög ne tela’a ma kelea’ehanisit ne soko. ‘Is sir mea’mea’ ma ‘e ökök ne Covid-19 ta ue’ se’, ka sokoan pel te’is ma gou ‘inea ne ‘Aitu pa fäeag ti’ pau se ‘isa. Gou ‘ua’ua’akiof se Fekau Mario Rigamoto, Fekau puer ne Kaugarueag ne mou se Rotuma (Division), Hensasiag Fekau Rotuam ‘atakoa, Hensasiag Hua’i,  Gagaj ‘es puer ne hanua, matanitu, hensasiag rotu ma ‘os famör Rotuam ne a’es’ao’äk puk resön hete’is.

Lio ne ‘ua’ua’aki leuof se hensasiag Rotuam ne mou se kaurot te’is “Jesus only Fellowship ‘ne noh ‘e Rarotonga ne huag toa’ ma togia Puk ne mou se Jujakiga ma pò la ‘is famör Rotuma la a’es’ao’äk ka kal a’noa tög ra. Gagaj ‘Aitu la tög a’nonojoa se kainag Rotuam ne noh helav ‘e Rarotonga.

Nonoj la ‘ua’ua’äk tape’ma se kaugarueagat ne mou se für’akiag ne resön ne terani: hensasiag ne für’akia se fäeag Rotuam ta, hensasiag ne hat ho’ia ma a’nojoa, o’honit ne pania garue te’, ma haiasoag tutu. Noa’ia ‘e haiasoag ma ro’ait’äk ne garue ne mou se kaugarueag te’is.

‘E reko ‘is noh ‘e ta av noanoa ma av fakmuri, gou far hanis uanmaf ‘on ‘Aitu la haiasoag la a’lalan ‘on fäega, la po la resön ‘i la ‘es fuag, ‘es va’, ‘es ‘av, ka ia la ‘os a’ne’ne’akiget ‘e te’ ne terani. ‘On fäega la man ka ‘es hue a’ti’ se ‘os haikainagaga ‘e foro ka a’ti’ se’, ‘os maür haikainagagat ma ‘os Ö’fa fak Lagi.

Gagaj ‘Aitu la a’alalum’äk tör ne fau 2022 ta, la av ‘oaf’oaf ka alalum airet se te’ ne hensasiag Rotuam ‘atakoa.

Fekau Jioje Taito
Fekau ne Churchward Chapel Circuit