Nadawa

Ri Ha’ ‘on Gagaj ‘Aitu (Janueri)
1Puk ‘on Sau 5:7-18

Gagaj ‘Aitu Jihova, noa’ia ‘e hanisi ma mata’ ‘os mauri ‘e foro ma ‘e ‘Ata la ‘is la po la kamat hoi’ak ta faut, a’sok garue ‘atakoa ne fū’ak se ‘is ‘atakoa. Fӓeag ‘on ‘Aitu ‘e Puk Ha’a ‘ea Solomoni ososia la fu’akia Ri Ha’ ‘on ‘Aitu. Ösös rauraut Solomoni a’sok la re’aia garue te’is ka Gagaj ‘Aitu haiasoag ‘on garue. Ut 7 Ma Hirama ‘oaf a’ti ‘e ‘on poag ne fӓeag ‘on Solomoni – garue ‘on Solomoni ma ‘on fӓeaga la’oag ‘esea se fu’akiag ne Ri Ha’ ‘on ‘Aitu. Jihova ‘Aitu a’alum’ak vah ‘on mauri ‘e on pot fak ‘Aitu ma haisaoag la ‘on faksor’ạkiag ne se Sau ta Hirama la fekau’akiag ‘n fa hȧl ta se Lepanoni la faim siat (cedar) ta. Hirama ‘oaf ti’ pau po ‘e Sau ta Solomoni ‘ea ӓe inea pau fa hȧl ta kat majau vao ra la fai ‘ai fak se ‘os fa
haȧ. Fӓeag ta a’ne’ne’ak ‘oria haikainagagag Hirama, Sau ne Taisi ‘e Saitoni ‘ea gou tӓla naafua sita ma pain ‘atakoa.

Ososia la fu’akia Ri Ha’ ‘on ‘Ạitu, tes ta ‘is ososia la fua’akia ‘e fau 2021, se ‘os kaunohoga, kauaghanua, ma ‘os kaurotu. Te ka ‘is ös te la mou se ‘os ‘Ạitu, ‘os kaurotu, ‘os Ri Ha’a? Kaurot Puer ta vӓem ta garuet la ‘is la re’ia, ‘os garue ag’esea fak ma ne ‘is mou se Churchward. Sau ta Hirama ‘ea, Gou tӓla na’af sita ma pain ne mou se ‘is ‘atakoa, ‘os ‘ua’ua’aki se Jihova ‘os ‘Aitu, ‘os la fӓeag’ak ne lelei ‘on ‘Aitu se ‘os mauri ma ‘os garue se Rotu. Te aire kat vaohian ra av maoi si’hap ‘es ne’ne’ ‘on ‘Aitu Jihova tӓla a’potsusunua ‘os mauri se garue Ha’ ta se ‘on Garue ‘atakoa. ‘Ai peni’isi sita ma pain ta. ‘Ai lelei pau
se fū’ak ne Ri Ha’ ‘on ‘Aitu. Pot ‘on Solomoni ma ‘on aier se garue te’is haiasoa la Ri Ha’ ‘on ‘Aitu la fū’ak ma a’vah a’lelei. Gagaja alalum’ak te’ ne ‘os amnak ne la garue’ak ‘os ava ma talene se ia Jihova.

Ro’aitu: Noa’ia ko Gagaj ‘e reko ‘ou fū’ak te ma ‘ou a’hӓe lelei ‘atakoa ne ‘ӓe alalum’ak la mou se ‘amisa ‘e maur te. Figalelei ma haiasoag ‘amis la garue se ’ӓe ‘e te’ ne ava ma aier se he’oag tutu ne ‘ӓe na se ‘amisa.

Jihova ‘Ạitu – hū ne mauri (Mai)
Resönta: 1 Puk ‘on Sau 17:8-16
Ut ne Puk 13-14: Ka Elaijia ‘eag kikia se ia, “Se ‘es ta kokonot. La’ au ma osia …

Fӓeag ta a’helav aier pau, ‘e laloag ne av tape’it ‘e mӓur te, famor ma’oi pau toak ‘e garue, ne garue  teran he ua ‘esea ma togi mut sin nea’meamea se’ la kop la kaunohoga la tuk sio selen ne mou se ala,  ‘af’afa ne COVID-19) ta rak’ak ‘e ratio ma kel’ak ‘e mal ta (FaceBook – FB) ne‘af’af popo se tea’at ‘on ma’oi, ma hele’ la rogrog ma’oi la fӓeag’ak, famori a’hӓe’ak la la’ la kō ‘e vại ta ne matanitu foar se famori la la’ la vaccinate ma hanue ta ruerue a’ ti pau.

Parofiata ‘ea se hȧn takfue ta la osia ‘emuar ‘ate ta ka ‘ӓe hoa mumuamo ‘eteu tela’a ma kota ‘ӓe osia te ne la rese ‘ӓe ma ‘ou le’ ta. Osia vӓeag ne mou se ‘Aitu ma ‘on garue ka ‘ana pesin hӓeag faromaf
heta ma ja hӓeag lol heta kal öf ra e ‘e ta av. Jihova fӓeag se ‘isa ‘e ‘os maur te. Av ma’oi, ‘os ava kal pora la na se garue ne Rotu, ka vavhian se, ne fürmaria se’ la ‘is la nono ’e ‘os hanua, ma tē ma’oi ‘e ‘on
kaunohoaga nono ma ökök ka Jihov pa ‘ea kikia se ‘isa la osim te ne mouse Goua. Ös mumuen ‘eteu tela’a, Parofiat ‘ea.  Garue ne ‘is po la re, po la a’sok ‘e av ne ‘is ne’ne’i ma mauri sosoneia la mo, se tȧr la  amue’ia ma ‘af’af’ia, se kokon’akia nono ma ofien pesin faraoa ta. Parofiata ‘es se han ta, se ‘es ta kokonot, garue se Rotu, nā ‘os vahia. Rogrog te a’faiag lelei pau, ‘ea vah Elaijia se han takfuet ‘e
Sarafata. Jihova ‘io se ‘os mauri ‘e te’ ava, hil se han takfue ta la nana tela’a se Parofiat. Jihova os vah tela’a ‘on Parofiat Elaijia, ma ‘on han takfue ta ma ‘on le’ heta.

Kal po pau ra la famör ‘on ‘Aitu la noh sög. ‘Os ro’aitu la a’sok ka ‘is kop la vala’ se ma garue’ak ‘os ava se garue ‘atakoa ne ‘is po la re se Rotu ma garue Ha’ ‘on ‘Aitu.

Roaitu: Noa’ia Jihova ‘e hanisi. Noa’ia ‘e a’hoi ne ‘otomis pesin faraoa
ma ja hӓeag lolo ‘e te’ ne terani. Emen.

Ro’ait ‘on Gagaja (Sepitempa)
Mataio 6: 9-13
‘Otou le fa mafue ta ‘on teran a’su ta ‘e ran ta ne Sepitempa, ma gou ‘inea ne te’ ne ran ta ne hula, ia tē leleit po ‘e ‘is surum se ta hual fo’ou. Gou oaf la ‘ea kamatag ne Roa’it ‘on Gagaja – ‘Otomis Ö’fa’at tӓe ‘e Lagi,
‘Ou asa la af’ak la ma’ma’ … ‘Is ro’ait la ‘on Pure’aga la leum ma ‘On rere la sok fak ma ‘e lagi ma ‘e
ran te tape’ma. Noa’ia Jihova ‘e hanisi ma haiasoag ne ‘amis la ‘inea la ‘ou Pure’aga la leum ma ‘ou Rere ‘esea la sok ‘e lagi ma rante tape’ma. ‘Amis sur se hual ne Sepitempa ma hual ne Okosita vah’ia. Aier ‘af’af ta la’la’ kal’ak ‘amis ka ‘amis ‘inea ‘ou rere sok.

‘Af’af ta hele’um ma ‘amis noh totoak ‘e laloag ri ma matua ‘otomis la’riri’i ma ro’ait’akia ‘otomis mauri. ‘Es ‘e pilifi ne COVID-19 sok la ‘amis la ‘inea ‘ou pa ‘ese, la af’akia ‘ou ‘Asa Ha’a la ma’ma’, ‘amis la po la rӓe lelei se kamatag ne hual te’ ma garue ‘atakoa ne noj la ‘amis la a’sok ma fu’ak a’lelei pau garue se pa ‘es ‘on ‘Aitu. Roa’itu pa ‘es la ‘is la rau fӓeag te ma noh’ak se ‘os huga ma garue’ak rer ‘on ‘Aitu ‘esea, ma ‘inea ‘on esao ma ‘on alalumu. ‘Is far tela’a tape’ma la ‘is la ‘a ka la taumar, ma ‘ia la fau’akia ‘os sara, la ‘os haifӓegaga la re ‘e ma’ma’ ne ‘os huga.

Ro’aitu: Noa’ia ko Gagaj ‘e hanisi ma rak’ak se ‘amisa la ‘amis la haifӓegag tape’ ‘e lio ne ro’aitu la kamatan hual te ‘is, la ‘amis la hao aier se ‘ӓe Jihova. Ko Pure’aga ma Ne’ne’i ma Kolori mou ‘atakoa se ‘Äe ‘e hual fo’ou te’is,

Emen.