Koronivia

Hatag ne ‘otomis terạni
Salamo 90:1-17

Ut ne Puku 12: ‘Äe la rak’ȧk tēan ‘ạmis ‘e ‘otomis hatag ne ‘otomis terạni, la ‘am la pō e ta ‘otomis huạg ‘atmai. ‘E ‘otou garue ta, gou fa‘ la‘ pạu la ȧs garue ‘e Pasefiạk ta ma la‘ tape‘ma se ūt ma‘oi ‘e rȧnte‘. Gou fa‘ la‘ ka ‘otou a‘hӓe ti‘ pạu se lä‘riri‘ ta, haharạgi ka a‘ti‘ se ö‘ruạ mafuạ ruạ ne gou rou ‘e hanue ta.
Fer ‘e ‘ahại fere iạ tēet ne gou kop la rē ma ‘e av ‘e ‘on rerege, ‘otou huga rue‘ȧk pạu, a‘ti se av ne ar läg ta kat fürmaria pạu ra. Ūt ne pūk het ne gou ‘oaf pau sin ta Salamo 90:12. Gou ‘inea ne Gagaja ‘esea ta ‘inea
nampa ne terȧn ne ‘otou mạuri, ma gou a‘fürmariạ‘ȧk ‘otou huga ‘e ūt ne pūk te‘is. Gou ro‘ạit ma kikia la Gagaj ‘Ạitu la a‘hanis tape‘ma ka gou pa ‘es la ‘e terạnit ne hatag ne mäur ‘on o‘rua la ‘el la hele‘ ka gou la ma iria ‘e hanue ta.

Masȧ‘ COVID-19 ta pō rȧnte ‘e fạu 2020, 2021 ma la hele‘ se fạu 2022. Hele‘ la rạnte‘ la lockdown ma ‘ahại fere kat po ra la fer. Ūt ma‘oi ‘e Fiti lockdown ma famori nono ma ‘e ‘oris hanua. Gou kamat garue ‘e hanue ta ‘e Maji 2020. ‘E June 2020, ka Gagaja he‘ ö‘hön ta ma iạ a‘u‘uen. Fạūt sir ma ‘e July 2021, Gagaja he‘ tape‘ma ‘otou ö‘fa ta. Gou ‘uạ‘uạ‘ȧk se Gagaj ‘Ạitu ne iạ a‘sok ‘otou ‘amnạki ma gou pō se huạl he häk ‘e hanue ta ma ö‘rua ma kota ö‘hön ta au‘uạ ma gou po se ta fau ‘atakoat ma kota Gagaja he‘ ö‘fa ta. Gou inea ne ‘oria mauri a‘vӓrvӓr pau se Gagaj ‘Ạitu ‘e reko iria nā vahia se Rotu, hanua, garueaga ma kaunohoga.

‘E av ne ‘is inea e ne ‘os terani ma nampa het ne Gagaj vӓe vahia, ma noj pạu la ‘is la ȧs‘ȧk la te‘ ne tē ‘e ‘os mạuri la a‘vӓrvӓr se ‘os Ö‘fa fāk Lạgi.

Ro‘ạitu: Gagaj ‘Ạitu, ‘ӓe figalelei ma rak‘ȧk tēan ‘ạmis ‘e ‘otomis hatag ne ‘otomis terạni, la ‘ạm la pō e ta ‘otomis huạg ‘atmại, ma ‘amis la rē tē lelei ma se noa la hele’ se avat ‘ӓe he’oe ‘ạmis ‘e reko ‘ӓe Jisu ‘otomis Sạu ka A‘mạuriạg ‘eseat ma,

‘Emen