Vatuwaqa

Reson ta: Jone 14:25-31
Ut ne Puk ta 26: Mane A’furmariag ta ‘At Ha’a

‘E fau 2014, ‘amiar ma mapiag het la’ manea’ se hanua – Niu Siragi. Teran het ka lӓ ta ār pau, uas ta malol ma ‘is ‘elsema kal rӓe ra se hanhapat ne tore. ‘Otomiar ma’piag heta fau het ma fuma ‘esea. ‘Amis
mamaf se’ ka ia a’tö’tö’, kal ‘iom sus ra, ka ia pa kat ‘ate ra. Hensasiga la’aris se garue, ka ‘ea, “Nono ka pepe heta kat fürmaria, ma kop la hoa’ se haspeta la kel’ak. ‘Ạmiar rạ’ hạisuiag, ka fürmariet kat pora.
Nono ma o’hon ta ‘ea, “Gou a’hӓe ‘on ‘efe rū, ma kop la ‘iom’ȧk vại ne lӓg ‘ef ta. Ka vại ta kop la la’ se taon het reag ‘elem se utut ne ‘ạmis noh se.

Gou la’ lā, tög se vại ta ‘e kemesta ma jor lā hoi’ȧk. Vại ta ‘iom’ȧk sema ma mapiag heta po fürmaria.

‘Os mauri tape’, ‘e laloag ne noanoa ma te ne sok se ‘os mauri, ‘is la po fürmaria kikia, kepoi ka ‘is he’ se Gagaj Jisu.

Ro‘ạitu: Noa’ia Gagaj Jisu, ‘ӓe hū ne ‘otomis alalumu ma fürmaria,

Emen.

Inea Telene ma Garue‘akia
Resonta: Roma 12:1-6

Ut ne Puk Heta 3 – La le’et se sikia ia ‘e ‘on a’hӓe … ‘E teranit ka sagavenet piligam se gou la po la saraoa filo’ ne ‘on haina. Gasau his vahia ka ‘on haina kat po ra mös, ma kop la hoa’ se haspet ta
la taku la kō ‘e vại ne mös ta.

‘On kia kat pō ra la fürfür ‘e reko ti’ ne rū ta. ‘Otou ro‘ạitu la Gagaja tӓla naam ‘on a’ne’ne’akiga ma a’ne’ne’ia o’hön te. Sarao ta kat seminte vӓh ra, ka o’hönta kararaān, po ‘on fürmariet ma mosean.

‘Ạitu lelei se ‘isa ‘e te’ ne ava. ‘On haiasoaga nono ma ‘is ‘e te’ ne ava.

Gagaj ‘At Ha’a – ‘is kop la fa ‘on haiasoaga.

Ro‘ạitu: Noa’ia ko Gagaj ‘e tӓrtӓr ne ‘otomis far te.

Emen.

Hanisit ne Fumou
Resonta: Salam 136: 1-12
Ut ne Puku 1: ‘Au la ‘ua’ua’ak se Jihova ne ‘on meavhanisi fumou …Teran het ka o’honta ‘ea so ‘on le’ fā haharȧg mea’mea’ heta ne ia kal la’ra se’on kaumane‘aga la manea’ vӓvӓr.

Le’ fā heta reag la toa’noa ma tā ‘on‘on o’hon ta kat fürmaria ra se ia. Ag ‘on la’riri‘i, le’ fā heta ‘io ka o’honta saunoa ma, ma ia jön se kaumaneag ta. Manea’ ta sor pau, le’ fā heta rӓea ‘on uncle het leuag ma ia inea ma ‘on o’fa hete’ la’ la hagoat, ma ta ia taupiria. Ao het ne o’fa heta hagoat ma po tē pau, le fā heta sapoa ‘oria ‘af mamas ta ne hӓea ‘oria i’a ma iria fo’am ma o’fa ta vӓe ma nā ia’ se fa haharӓg ta. O’hon ta nono se ia’ ho’iof se hanue ta ka ho’am ia’ ma ‘oris ‘omoe ta vah ‘e hanisit ne a’ha’um.

Rogrog ta kel’akim se ‘isa ne ao ma’oi ne ‘is toanoa, ao ne ‘is kat a’fai ra se mua’ak tē, ne pa ‘es ‘on Karisto ta, ka ‘on hanisi gat kea o fạ’ ‘is, ‘on hanisi kat uf ra ‘e isa.

Ro‘ạitu: Noa’ia ko Gagaj ‘e hanhanisit se ‘amisa ‘e ao ne ‘amis la’ tū ‘e ‘ӓea, ka ‘ou hanisi nono ma se ‘amisa. Röt’ak ‘omis ko Gagaj. Haiasoagan ‘amis la noh a’fai ma taupir se ‘ou mua’ak tē.

Emen