1984-2024 ROGROG NE HAT PUK HA` SAPATO `E CHURCHWARD CHAPEL
`Ąu la `uạ`uạ`ȧk se Iag ma noanoa`ia se `On Āsa.
Ne Jihova lelei; `On mäeavhanisi la fūmou se āv se `es gata’aga ne tore, Ma `On huąg āire tape` ma, se te` ne fūp famör `atakoa.
Salamo 100:4-5
‘E ‘On Kamataga
‘Ąmis kat po ra la ‘inea nonoj ne Hat Puk Ha’ Sapato kamat ‘e fạus ta, ka ‘ạmis ‘inea ne
maj ne Hat Puk Ha’ Sapato kamat vąhia ka ‘is kat seminte ‘es Ri Rotut ra. ‘E te’ ne Ri Rot
‘atakoa ne ‘is Rotu e sin: Centenary ta, Butt St., Dudley ne ‘e Raiwaqa, āvat ma ne rogrog
‘on lä’riri’i vạhi e, lä’riri’i hot ‘e Rotu ma la’aris ‘se ‘oris kilasa – ‘e reko iris kat po ’ia ra
la päe a’totoak se vạhiạg ne Rotu ‘e laloag ne Ri Ha’ ta. Resoni ti’ia āv a’fąi rogrog ne Puk
Ha’a, pán tē ne suą mak se Rotu ‘on vạhiga. Iris ne re Hat Puk ‘e āv he ta’a mou se lelea’ haharäg ne Rot Haharäg ta (MYF ta). Sapato ‘on Lä’riri’i ti’ ke a’a’sok ‘e Centenary ta. ‘E reko ‘os āv ne Rotu ‘e he ta he ta (1pm) ‘e asoah ta, Sur fak Gagaj ‘on Jisu, la a’sok, lä’riri’i la suą ’ia “Jisu höt ma leuāg”, rạu nuj ma ‘oris ūt ne Puk Ha’ he ta se o’o’i, ma tá’ mane ‘on ti’ ne ‘oris garue ta. Fekąu ta ne fa marag ta sok’ák ma garue ne Rotu, ne îof’ák a’ti’ se Sur fak Gagaj ‘on Jisu se Jerusalemi.
‘E ãvat ne ‘os Ri Ha’ ta Churchward a’vạhie, ‘is nōnō rērē tapoa ma fạu his, ‘e kamatag
pau he ta. ‘E reko ma’oi iris lelea’ rē Hat Puku ‘e laloag ne Kąumakag ti’ ta tape’ ma, iris
pū kikia se Hall ta la re’ia ‘oris kilasa ‘e vạhiạg ne “anthem” ne Sapato ta.
‘E ta ãvat, ‘e reko noanoa ne sala, la leum se Suva, kạu Rotu te Delainavesi a’sok ‘oris āv
ne Hat Puk Sapato ‘e täe’a. Ma ‘e Sapato ‘on lä’riri’i, iris tála muą’ąkia Rotu ‘e mijarán ta
‘e he hif he ta. Hat Puk ne Suva tála a’sokoa Rotu ‘e he tā he ta. Fa Huá’ ta Rupeti Mua ta
muą’ąkia iris.
‘Ąmis sąkior hö’ se iris ne muą’ąkia maj ta ‘e ta āv het, iris ne huá’ se maj ta ‘e ta āv het,
ma iris ne re Hat Puk ‘e ta āv het, ma ‘ąmis räe ne ‘is ma lelea’ ma’oi pạu garue ‘e ta āv
het se maj ne lä’riri’i. ‘Oris āsa te’is pąniof la a’häe’ąkia ma ‘uą’uą’ąkia iris ‘e ‘oris garue
se ‘Ąitu.
Ö’hön ta Lavenia Elaisa rērē Hat Puk ma, ma puer mea’mea’ se’ se maj ta ‘e reko iạ ne
pure la’ manea’ se hanua, ma kat ho’im ra ‘e reko “coup” ta sokoan. Lavenie puer karąu se ãvat ne Jioje Fatiaki fū e la muą’ąkia maj ta. ‘E ãvat ne Akanisi Pene fū e la puer se maj ta, ąi nā la ö’rua Lavenia ma Susau la ö’ruạ ne maj ‘on lá’riri’i. ‘Oria hąiasoaga ‘e te’ ne garue ne mou se maj ta, fak ‘at ma fak hanua tape’ ma, te fuąmamąu. ‘E ãvat ne ö’rua faksor’ạki e la iriạ la pū sio ‘e ‘oria fuạg he te’isi, maj ta kat hil ra ta ö’rua hoi’ák. Maj ta váh pạu ma ‘e Hán Puer ta ma Huá’ ne maj ta.
Ö’ö’ Hąiąn Ne Muą’ąkia Maj Ne Hat Puk Ha` Sapato, ‘e ta āv het: Voivoi`ạkiga ma `uạ`uạ`ạkiga la rē ma kikia se Gagaja ‘Ąitu `e reko hạiạn ne tár he`ogat la muą’ąkia maj ne Hat Puk Ha’ Sapato, kama tama `e säeag ne Ri Rot ta Churchward Chapel. `Oris hanisi se lä’riri’i, fēa se `Ạitu, nānā ne `oris āva, ma ‘oris fe’eni `e rak`ạkiąg ma muą`ạkiag ne lä’riri’i `e Fäeag `on `Ạitu la a`mȧür`ạkiga `e Jisu Karisto la sok se te` ne lä`riri`i.
Hua’ ne Maj ne Hat Puk Ha’ Sapato, ‘e ta āv het:
Lelea’ Rē Hat Puk Ha’ Sapato ‘e ‘i – 2024
Lelea’ Rē Hat Puk Ha’ Sapato ‘e ‘i – 2024
1 | Akanisi Pene | 6 | Jienei Eliesa |
2 | Alanieta Fatiaki | 7 | Kelly Finiasi |
3 | Christine Garsau | 8 | Motofaga Nakaora – Han Puer ta |
4 | Feaserue Kafoa | 9 | Repeka Ufiamorat |
5 | Jeannette Ufiamorat | 10 | Robin Rigamoto |
6 | Jeunesse Viliame |
|
|
Resön ne Hat Puk Ha` Sapato
Resoni lelea’ haharäg re Hat Puku fäeag’ąkia rogrog ‘in’inea ‘e laloag ne Puk Ha’ he ta,
ma suą ‘chorus’ fuąmamąu. ‘Is ás’ák la tąupir se Resön ne nāame ‘e YPD ta, ka Puk Resoni fá’ ke ‘e fäeag Fit ta, ma noanoa se ‘iris ne re Hat Puku ‘e reko ‘iris kat ‘inea fäeag Fit ra. Ãvat ne ‘is fūe la Circuit, ma ko tá ‘is kamat la ás’ák la tąupir a’ lelei se Puk ne Resön ne YPD ta. ‘E ta ãvat, ás’ák se la für’ąkia Puk Resoni se ‘os fäeag ta, ka “project” he te’is kat ‘inea ne a’váh ne igká’. ‘E reko tekäe he te’is, ‘ąmis räe ne rogrog ma’oi pau ne Puk Ha’a kat fäefäeag’ák ra se lä’riri’i. Po ‘e kat ‘es “structure” ra se Resön ne kilasa la sok’ák ‘e fąūt se fąūt. Resön ne “Discipleland” series, Han Puer ne āv he ta’ag ho’am ma kel’ák mumua se Fekąu Samuela, ne maj ta la po la tąupir sin? ‘E reko hąisok’ąkiąg ne Resoni ‘e fąu se fąu ma lä’riri’i rak tē, ka lelea’ rē Hat Puku rak tē tape’ ma ‘e ‘oris ososiąg ne irisa se Sapato ta. Resoni fa’ Fifis ma vavhiąn pau. Rue’ák ne Hat Puk Ha’ Sapato a’sok se Resön ‘i, ‘e fąu ma’oi. Resoni po ma hąiväeag’ák se hensasiąg ‘e Rotuma, ‘e ãvat ne Fekąu Jioje ma Fekąu Mario fū fak Fekąu Pure ‘e Rotuma.
Āv ne Hat Puk Ha` Sapato
Hat Puk Ha’ Sapato a’sok kikia ‘e Rot asoah’ ta ‘e 1pm, ‘e vạhiạg ne maragat ne mou se
lä’riri’i. Ma ‘on roa ne ‘on luąk ne Resön ta, tūk kikia se roa ne Rotu ma marag ta. Ka āv
he te’is jen a’ his ‘e reko jenjen ne āv ne Rotu ma re puer ‘on o’o’i.
Maj ne Hat Puku nōnō ma jen ’ia ‘otomis āv he ta la fū lelei se jen ne sok sok ‘e Rot Ti’ ta. ‘Av ne Hat Puku jen se 9am, jen se 8am, jen hoi’ák se 9am. ‘E 2023, rot mijarán ta ‘e he hif he ta toak’ák váh, ma rot ‘eseat a’sok ‘e 10am. Hat Puk Ha’ Sapato momon’ąkia vagvag he te’is, ma Hat Puk Sapato a’sok ‘e 7am – fak mane ‘os temamfuą ne fū’ąkia ‘os Ri Ha’ te, rere ‘e ‘on kamatag pạu he ta.
‘E laloag ne āv ne Hat Puku, po ma a’sok sin Praise & Worship, Hąiro’ąituga ‘e Sapato
mumuą ne hula, ma muą’ạkiag fak’āta, ma ko ta la’ se ‘otomis kilasa la re’ia Resoni.
4 `E fạu 2020 se fạu 2021 av ne `af`af ta COVID-19 pandemic ma foh ta ha` la hạitaunạ`iag ag`esea ta famör ma`oi (‘lock down’), ma Hat Puk Ha’ Sapato höl se ‘online’ mode. Tē aire te fo`out tekäe ` `is kota la garue`ȧk mumua, ka hạimua`ạkiga ma maraga kat toak ra ka pō ma sok’ȧk `e “livestream facebook platform” `e av het ne Hat Puk Ha’ Sapato a`a`soko. `E te` ne Sapato, Hȧn Pure ta Motofaga Nakaora, Ö`hön ta Akanisi Pene ma kaunohoag ta `e Aidney Road ta a`sokoa hạimua`ạkiga. Sasiag he rua `i Alanieta Fatiaki ma Jieni Elaisa a`potsusun `technology support`, ma maj te` sur`ȧk tape`ma hạiro`ạituga ma a`sok `e `Zoom platform`. `E reko roa ne av het ne lä`riri`i kat po ra la tauna`, lelea` re Hat Puku kamat la a`sok `oris kilasa `e online classrooms. Kop ma te lelei ma`oi hoi`ȧk kamat `e laloag ne av te`is. Ö`hạian ne rē Hat Puku kamat ta mua`ạkiag rot `e Sapato `on O`honi ma pō ma hạiväeag tape`ma Kato`ag Fakrot ne `Ạitu fū`ȧk ma nā se famör Isireli ne a`a`sok `e te` ne fạu. Hạiväeag te`is a`sok ka hele`um se `i `e `on av fại ne kato`ag ta `e `laloag ne fạu ta. Kaunohoag ne Hat Puk Ha’ Sapato tē ag`esea `e teran fakmür ne fạu ta ma Hȧn Puer ta hạiväeag `e `livestream` Fäeag `on `Ạitu la a`nene`ȧk kaunohoaga se fạu fo`ou ta.
`Amnȧk ne Hat Puk Ha’ Sapato
`E laloag ne fạu 20 ne vȧh se, `e hạiasoag `on Gagaj `Ạitu ma kel`ȧk te ne At` Ha`a, Hat Puk Ha’ Sapato a`fūmou`ȧk ta `amnạkit se maj `on lä`riri`i la `ut`ut`ȧk se` garue ne Hat Puk Ha’ Sapato. `E räe`ȧk te te‘is, `VISION` ne fū`ȧk se Hat Puk Ha’ Sapato la`oag `esea ma garuet ne Gagaj Jisu rou se `isa, la Hạiputugan Mȧür Fak`at `On Lä`riri`i La Iris La Fupfup la Tisaipel Aier `On ` Jisu Karisto (To Make Disciples of our Rotuman Children of the LORD JESUS CHRIST). `Amnȧk te`is a`mah`ȧk la utnes maurit se Iag `e mea`mea` ne oris fạu. Hoi`ȧk, a`mah`ȧk tape`ma ne le`et ne pa a`sok garue te`is kop la nā `on ava ma fū mou se he`oag ta `e mua`ạkiag ne räi`i se `os Gagaja Jisu Karisto.
Garue ne Hat Puk Ha’ Sapato
Gagaj `Ạitu noa`ia ma `e laloag ne fạu häkeaghulu, garue ne Hat Puk Ha’ Sapato pō ma
`ut se mua. Garue fo`ou ma`oi sur`ạkim ma kamat `e fạut se fạut la hạiasoag se lä`riri`i la `oris la hat ma rakoa Fäeag `on `Ạitu ma `inea ne `Ạitu.
Hatag ne lä`riri`i
Hatag ne lä`riri` la pō la hele` `e lä`riri` 190`e kamatag ne fau ta ma tuk `e a`vạhiag` ne
Sapato `on La`riri`i. `E fau 2019, hatag `on lä`riri`i hele` `e 190 se a`vạhiag ne fau ta.
Te`is hatag ti`ut `e laloag ne ta faut. Hatag ne la’riri`i tuk `e vahiag ne `af`af ta COVID
19, hun a`ti` se noanoa ne kaunohoga haipoag ma ‘e av heta. `E fau 2023, Hat Puk Ha`
Sapato tög ma a`lelei motokaat (van) ma ho’am lá’riri’i `e ‘oris hanua `e te` ne mijarán
ne Sapato se Ri Ha` ta. `E terani te`i, “pick up” ta kamat `e 5.30am `e te` ne mijaran ne
Sapato, kamat `e Vuci `e Nausori, Nepani, Nadera, Caubati, Wairua (Tamavua),
Samabula se Toorak, ma motoka ta la` a`fol.
Kamp ne mou se Lä`riri`i
Garue hoi`ȧk sur`ȧk tape`ma la lä`riri`i la pō la hạikạinagag ma lä`riri`i `e oris fup ta. Hat
Puku kamat `e ta terȧn fak `oaf`ofat (Fun Day) ma Rally`e fạu 2000/2001. `E avat ne
a`häe ta fup la a`sok ta kamp het se lä`riri`i, `e fạu 2008, räi` rak hititi` ta (`e High
School) ta pō ma a`sok kamp mumuet `e Coral Coast Christian Center, Deuba. `E fau
2009, lä`riri` `atakoa `e Hat Puku po ma sur kamp, kamat `e lä`riri` ne Kindy, fạu hak.
Kamp ta a`sok `e te` ne fạu. `E fạu 2019, kamp ta a`sok se Rotuma.
Joshua Generation
`E laloag ne fau maoi ne vah se`, hatag ne lä`riri` mamfua ne Kilas 4 (fạu 15 se rer) ta `ut
pau. Räi`i `e Kilas 4 ta hele` `e tertiary (USP). Joshua Generation (JG) kamat ‘e fau 2020,
ta “Vision“ ma kel`ak te te` se iris räi` haharag susuneia ne tae `e high school ta ne
tertiary ne kat seminte po garue ra. `Amnȧk ta la iris la kamat la hạimua`ạkiag fak`atam
iris `e Fäeag `on `Aitu `e Puk Ha`a la tokoa `oris mȧür fak`ata. Lä`riri`i ‘e JG hoi’ak pō
ma ȧs, hạiväeag ma lä`riri`i `e Veilomani Boys Home `e Ba, ma `e fạu rua ne vȧh se, ös
tēfakhanis se räi fā ne noh `e Veilomani. Hạimua`ạkiag Ne Mou Se Hanue Ta Isireli
Ma gou la ạlạlum`ạkia iris ne la fäeag ạlạlum`ạkia ‘äe; Ka le`et ma ne la fäeag ha`oa `äe, gou täla ha`oa ia;
Ma te` ne kạinag tūtū `atakoa ne rȧn te` la pō ạlạlum `e `äeag. (Kamataga 12:3)
Hat Puk Sapato fū ag`esea ma hanue ta Isireli `e fạu his ne vah se, ma nā oris hạiasoag se International Christian Embassy of Jerusalem (ICEJ) ta. Hạimua`ạkiag ne mou se hanue ta Isireli ma famör Jiu sok`ȧk ‘e fạu maoi ne vah se. Lä`riri`i pō ma tē ag`esea `e kato`ag garue ne ICEJ ta. `E fạu 2015, lelea` re Hat Puku a`sok ta ‘Pilgrimage Tour’ se Hanua Ha` ta Isireli. Fekau Mario Rigamoto ta mua`ạkia kau la`oag ta. ‘E fạu 2018, Hat Puku hạiasoag ma tog `Registration` se iris `e `os kaurot ta ne sur se ICEJ Oceania Conference ma a’sok tape`ma `Israeli Awareness` `e kamp het ne a`sok `e Rotuma `e fau 2019.
JIHOVA JIREH
Hat Puk Ha` Sapato aier`ȧk Fäeag ne Puk Ha`a ne eag: `Au la nā te, ma tē `ie la nā se `ạusa; foh lelei, has sio, rūrū, ma hoi la ji, iris täla ra`ạkiagea se `ạusag. Ne fohot ne `ạus foh tē e, tē täla foh hoi`ạki e se `ausa. (Luke 6:38) `Ạmis `uạ`uạ`ȧk se hanis `on Gagaj `Ạitu `e reko fup ma fuamamau ne koroa, nāag ne ta `on saghulu (tithe), te fakhanisi ma nate ne sursurum `e te` ne Sapato. `E fạu ma`oi ne kamatag ne Hat Puku, selen ma koroa ne Hat Puk Sapato pō po fene`ȧk se ke la a`potsusun garue ne fạu ta. `Ạmis `uạ`uạ`ȧk se `Ạitu `e reko kaunohoga ma te` ne iris `atakoa ne `Ạitu täe`ȧk la hạiasoag ma hāo tē se garue `on `Ạitu. `E te` ne fạu ne Hat Puk Sapato fu`ȧk garue (‘projects’) ne mou se maj te`, `ạmis räe se fup ne koroa ne surum, ma hạiasoag `on `Ạitu. `E Fạu 2023, ti` ne selen me surum `e Tā `on Saghulu hele `e $46,412.14. Koroa ne surum se maj ne Hat Puk Sapato pō ma a`sok ạsi ma na tē fakhanis se lä`riri` ne `af`afa ma kaunohoag ne hạipoag ma tē a`ru ma noanoa. Hat Puku kamat la hāo tē (Sowing) ma kamat se maj ne Child Evangelism Fiji (CEF) ne garue se lä`riri` rak ne Primary School ta. `E reko fup fak koroa, Hat Puk Sapato po ma hāo tē ma hạiasoag tape`ma se kạugarueag fak rot hoi`ȧk ne garue se lä`riri`i fak se Scripture Union Fiji (SUIS) ma maj tū hoi`ȧk. Maj ne Hat Puk Ha’ Sapato hạiasoag fak koroa se garue hoa` rotu (Missions) se Fekau Kafoa Muaror ma ö’hön ta Akanisi ma kạunohoag ta se Papua New Guinea. Koroa ne Hat Puku po ma hạiasoag se la`ot se Isireli ma la`ot se `atmot ta Rotuma. Koroa tape`ma hạiasoag la tög te jạujạu la pō la hạiasoag se ‘Praise & Worship’ ma garue `on lä`riri`i `e Sapato `on Lä`riri`i, tög ne “computers” la hạiasoag se garue ne a`sok `e “livestream”, tög ne ta motokaat la a’potsusun‘ia la’la’ ‘on lä`riri`i se Ri Ha` ta, ma ho`am iris se Hat Puku `e te` ne Sapato, ma hạiasoag hoi`ȧk ne po la a`sok se rotu. `E fạu 7 2023, Hat Puku pō ma tög solar power se ri `on Fekau Pure `e Mairo, Noatau. `E fạu te`, Hat Puk Sapato garue la a`leleia (renovate) ramp ne Hat Puku, ma ri la’o āg `on fa ma hąina, ma ri kuk he ta `e Hall ne Rotu.