21/03 Rȧn Hӓke – Mareko 6:14 – 29

Daily Devotional Readings

‘Amnȧk ta: ALAG MAM’AS ‘ON JONE FA PAPETAIOS TE
TA. (The brutal death of John the Baptist)

Ut 25-28a: Ma ta ia hö’ mij….Ma sau ta…Ma ta sau ‘ea…..

Sui’ȧk ta: Jone fa papetaios tē ta, iạ ta gagaj ha’at (saint) ne ri rotut ne gou garue fak fekạu ‘e ‘on ‘ihete’. ‘Äe la pō la räe se ta tupuạ’ ‘olot ‘on
Jone, ne fū sema se for ne ta vek ros pal mi’et. A’tatạu’ạkiạg te’ fu fak toa’ ma jujuof se muạ ‘e ‘on ‘uhapat. Juj’ạkia rirot ta, Karisto ma av ta’ag ‘e mua.

Ma kepoi ka ‘äe la sạkior a’lel ma ‘äe la räe se pii (bees) ‘e tē riạmriạm ne fū’ạkia kiạnre, hahan’ạkia se ‘isa hane ne lag mạ’us ta ne Jone
‘a’ae. Ma ‘ạmis matạ’ la se sir avat ne la rē kato’ag la a’häe’ạkia ‘on terȧn a’su ta.

Ka peak pạu ‘ạmis fäefäeag se ‘on alaga. Ma gou ‘oaf se a’häe ta’ag ‘e reko ‘on alaga mam’as sirien ma kel’ạkia ag mam’as ne famori la pō la a’soko.

Kepoi ka ‘is la fa’ lölö’ȧk ma, ma iạ kamatama la tēet ne tokana ‘e a’fek ne ‘os huga ‘e reko ‘is maf mamnȧk sirien. Ma iạ tē hoi’ạkit la ‘is la ‘inea ‘ia tē ne soko. Ma iạ la pō la ‘es fuạg. Ka iạ tē hoi’ạkit, kepoi ka ‘is nā ta av sin, hün ma se mam’as ne garuet ne soko.

‘Is kat ‘inea ra tē ne täe ‘e huạg ma a’häe ‘on Jone fa papetaios te ta ‘e a’ofiạg ne ‘on mȧür ta. Ia nā ‘atakoa ‘on mạuri la ososia sal ta se Karisto
ta, ka ‘on alag ta kel’ạkia raksa’ ma mam’as ne ‘is pō la hạipoag mar ‘e rȧn te’. Ma ‘Ạitu kat sại’ạkia ra iạ ‘e ag mam’as ta’ag. ‘E ‘os teag’esea ma ‘Ạitu,

kat ại’ạkia ra rū ma raksa’a ne a’mou hen se ‘isa. Pō se ma la Jone la kal aier’ạkia te ne soko, la fak ma ne soksok se ‘isa ‘e av ‘e ‘on rerege.
Ka gou pō la kel se a’tatạu’ạkiget ne fū’ȧk sio se for ne vek ros pal mi’et.

Ros pal mimie’ ta hahan’ạkia se ‘isa ‘ại kōkō ma totot ne ji’ȧk ‘e uluạg ne ‘ại fakrav ta; ta hạipor’ạkiget ne ‘Ạitu rē, ne iạ kal roua ra ‘isa ‘e av ne a’ru’ạkiga sokoe.

Ro’ạitu:

‘Ạitut ne ‘on’on mạuri, ‘e avat ne rȧn te’ hoi se ma ‘e raksa’a ma mam’asa, hạiasoagan ‘ạmis la ‘otomis pilifi la fūmou ‘e lal ne ‘ou hanisi. Se fue’kia la raksa’a la a’moumoua ‘otomis huga.

‘Emen