20/03/ 24 Rȧn Folu

Mareko 6:7 – 13 ‘Amnȧk ta: IẠ FEKẠU’ȦK SOASOA IRISA. (He sent them two by two)

Ut 7: Ma ia he’om iris saghul ma rua …..

Sui’ȧk ta: ‘E mạl (paintings) ne mou se Salvador Dali, ‘äe la pō la räe se ta ‘ại tok (crutches). Ma iris ‘eag ne ‘ại tok ‘ie kel’ạkiạg ne kat ‘es le’et ra la pō la mȧür iạ ‘esea het. ‘Is ‘atakoa kop la ‘es ‘e ta hạiasoag. Ma kop ma te’is ‘on hunie la Jisu la fekau’ạkia iris, le’ ruạ. Ka gou ‘inea ne noh gaogao, ma mȧür le’ ‘eseat, ‘is ‘atakoa agtạu vạhia ‘e ta av. ‘E ‘os huạlā ‘e mȧür te’is, ‘is kat la’oag’esea ra, le’ rua.

Gou a’häe’ȧk av het ne gou la’ gou ‘esea het ma gou kat pō ra la hot ‘e Dublin Airport ‘e pög ta’ag ‘e reko raksa’ ne lȧg ta. Ma hanua ‘el’ia se tu’ruạpög ta. Gou päe sio se pupui ta ma ta hȧn hoi’ạkit, ‘otomiạr fạu la hạila’oag, iạ rē ma ke tē ‘eseat. ‘Ạmiạr hại’ioag se’ le’et se le’et ‘e reko ‘ạmiạr fạiȧk ka le’et iạ ‘esea het. ‘Ạmiạr kamat la or. Ut la ‘ate pā vạhia ka ‘ạmiạr pō ma la’ ma tög tē ‘e koroa mea’mea’ het ta tēla’a la ‘ạmiạr la hạiväeag. ‘Ạmiạr a’es’ao’ạkia rer ne ‘otou ꞌaf ꞌül heta la tepel ‘ateag het, ma ‘e laloag ne or ma kaha, ‘etemiạr tēla’a: Cheese, faraoa ma tạn a’mȧm (juice), furia la ta ‘omoet. Ma ‘e ‘otomiạr la’la’ ‘e mȧür te’, hele’ la hạipalag ka ‘ạmiạr kat pō ra la hạifäegag hoi’ȧk.
Ka la pō se ma la ‘Ạitu la fekau’ạkia ta famör ‘is kat hại’ineag ra la hạiasoag la fak ma se ‘ại tok het (crutches)? Le’ ruạ ma le’ ruạ – soasoa. La pō se ma la le’et täe ‘e ‘ou foro iạ ‘eake ke le’et ‘itar hại’ineag a’lelei. Kop ma iạ famorit ne ‘otar sala hạipalag. Av ‘e ‘on rerege ‘is kat ‘es pạu ra ta le’ la nā he ta fürmaria. Ma kotä gou a’häeof se ta ‘omoe hoi’ạkit: faraoa ma uạini. ‘Omoet ne gou ‘inea hanisi ne fak se ta ‘ại tok het (crutches) la hạiasoagan ‘is, ‘e av ne ‘is noh gaogao e.
Ro’ạitu: ‘Ạit ne mạuri, ‘äe ‘ut a’elem se ‘ạmisa ‘e av ne ‘ạmis noh gaogao e. Kepoi ka ke mah sirien hün se kat ‘es le’et ra ‘e ‘otomis foro la hạiasoag, ‘äe fekạuꞌạkim ta kạumane’ag het se utut ‘ạmis täe ‘e ‘on rerege. Rak’ạkim la ‘ạmis la ‘inea ne ‘äe täe ‘e täea. ‘Emen.