Caubati

Pil’ifi ma garue

Hiperiu 11:1 “Äna pilifi ‘os tuạn‘ạkiạg se te ne ‘is ‘ạirot‘ȧk sin, ‘os
aier‘ạkiạg ne te ne ‘is kat kel ra sin.”

Praise the Lord! Hallelluiah! For his mercy & love endures forever ‘Ạitu noa‘ia ‘e hanisi!

‘E laloag ne kạunohoag saghul ne mou se pure‘ag ne Caubati, gou la ‘ea ‘ạmis ‘atakoa ạlạlum pạu. Noa‘ia ‘e hanisi Gagaj ‘Ạitu.

‘E avat ne ‘af‘af te’is COVID-19 surum se Fit ‘i, ma famör ma‘oi toak ‘e garue. ‘Ạmis ma kạunohoag ‘esea het kat ‘es le‘et ra garue ka vạhiạg ne ta av luạk pạu het, ö‘fa ne kạunohoag ta po ta ‘on garuet ‘e ta kampane hoi‘ạkit.

‘Af‘af mah sok se iris his ‘e laloag ne pure‘ag ta ka kat ‘es le‘et ra mao‘ȧk ‘on mạuri. Kạunohoga noh äf‘ȧk ma kikia ‘e laloag ne pure‘ag ta ma hạikạinagaga lelei. Pure‘ag ta ‘uạ‘uạ‘ȧk se hanis ‘on ‘Ạitu ‘e reko ö‘fāat ne toak ‘e garue ma ‘af‘af mah, ka ‘Ạitu a‘esao‘ȧk iạ la marag‘ạkia rog heg ta ‘e ‘otomis
Livestream ta ‘e rän fol ‘i.

Te aire famör ma‘oi pạu al ‘e masȧ‘ te‘, COVID-19, ke te‘is tene ‘ạmis po ma rako.
1. ‘Os la tuạnȧk‘ȧk aier ne ‘os mạuri se Jisu Karisto ne iạ ta sal ta, ka aier ta, ka mäur ta; ta kat po ra la leuạg se Ö‘fa ta ‘e ta sal tū, ‘e iạ ‘esea ma;

2. Hugag‘esea ma hạihanisiạg fak hạisạsigi (Brother’s keeper)

3. Teag‘esea ma garue ag‘esea (Being supportive of each other)

 Ro‘ạitu: Gagaj ‘Ạitu la ạlạlum‘ȧk te‘ ne ‘os mäur tūtū ‘atakoa! Hea‘hea‘lelei ne kesmȧs ta ma  ạlạlum‘ạkiạg ne fạu fo‘ou ta la ma te‘ ne ‘ạus‘atakoa ‘e as on Jisu Karisto

Hanis uanmaf ma fumou ‘on Jihova
Mamäe ‘on Jeremaia 3:22 – 23
“Hanis fumou ‘on Jihova ma ‘on puer hanisi la rē ma kikia, ne fo‘ou fak ma se mijarȧn ta ka aier fak ma se pal ne as ta.” ‘Ạitu noa’ia ‘e hanisi! ‘Is surumea se ta terȧn fō‘out fak ma se ‘on hanisi ma ‘on aire.
Laloag ne fạu te‘ gou fạu hifaghul (70 yrs), ma gou ‘uạ‘uạ‘ȧk se hanis ‘on ‘Ạitu ‘e reko ạlạlum‘ạkiag rạurạut ne iạ nāam se ‘otou mạuri. Kepoi ka kat puạ ‘e hanis ti‘ te‘is ma kop ma ‘otou mạuri kat hele‘um ra se teranit te ‘i.

Gou ‘io hö‘ se ‘otou mạuri ma gou la ‘ea ne gou ạlạlum pạu – Fạiȧkse‘ea Gagaj ‘Ạitu ‘e reko ti‘ ne ‘on hanisi ma ‘on re tē lelei se gou ma ‘otou kạunohoag ta.
‘Ạitu va‘ön‘ȧk ma gou la‘e ta av noanoa pạu het la po la gou la rak tē. ‘E ta av het ka gou noh ‘af‘af ma kop la sur la ser ‘e reko fep ma tạku tior ma räe ‘e laloag ne ‘otou ‘efe, cysts. Iris po ma sạkior se ma räe ne ‘eake Cancer, ka tä‘ma te ‘eseat, gou kop la sur la ser la ‘ut‘ạkia tene fup ‘atakoa ‘o. Hanis ‘on ‘Ạitu va‘ön‘ȧk ma tạk häk garue se goua.- Dr. Schramm ne puer ‘e av heta‘a a‘vavhiạn la gou la noh ‘e rum het gou ‘esea het se avat gou ne‘ne‘ la hö‘ se ‘otomis hanue ta. ‘Otou nohot ‘e hạspet ta gasav ruạ
atakoa ma ‘e reko kesmȧs ta ‘el ‘ia ma gou nā ‘otou vahia la suạ Christmas Carols se hạiạn ‘e Lancaster Ward la a‘jeamjeman ‘oris rū ma kokono ma foras‘ȧk tape‘ma fäeag ‘on ‘Ạitu. ‘E laloag ne rū ‘e reko garue
‘on tạku ne a‘sok se goua ka fäeag ‘on ‘Ạitu po ma marag‘ȧk ‘e maka. ‘E laloag ne ạsạsiạg titi‘ ne soksok se ‘otou mạuri, ‘otou mā ma pilifi se ‘Ạitu fumou ma kikia. Gou kat ‘inea ra ne te‘ne tē titi‘ ne soksok se ‘otou
mạuri ososia gou se heo‘ag ne Huạ‘i. Gou päe ma pas ‘otou Huȧ‘ Soko ‘e 2012 ma gou garue mumuạ se pure‘ag ne Kinoya. ‘E laloag ne he‘oag te‘ gou hạipoag ma kạunohoag ma‘oi ne ma ‘oris läriri‘ “special” ma ‘e reko gou ma ‘otou le‘ “special” het, gou ‘oaf la hạiasoag se iris ‘e fäeag‘ạkiag ne ‘otou “experience” ma Daniel ma tē ne gou po ma rako. ‘Eagke tä‘ma ‘ie ka gou po la hạiasoag ma‘oit ‘e reko ạsạsiạg
ne soksok se ‘otou mạuri.

Fäeag ‘on ‘Ạitu ‘ea ‘e Jemesa 1:2 -4
“Nono ka ‘ạus kạl se‘ ma ‘e faksar tūtū, ko sạsig, ma ‘ạus la hat ma ke la tē ne ‘oaf ‘atakoa; ne ‘ạus ‘inea ne  ạsạsiạg ne ‘omus pilifi garue‘ạkimhuạg röt‘ạki; ma lelei ke la ‘ạu la nonoj ‘atakoa, ka lelei ‘atakoa, ka se ‘es
tē var.

Hapakuki 3:17-18
“Kepoi ka fiki kal ‘es hue ra, ma rav ne vino kal ‘es ra ta hue het, kepoi ka kat pōom ra ta tēet ‘e vek ‘oliva ma kat pōom ra konot ‘e vek kono ma kepoi ka sip ‘atakoa la atia ma kal ‘es ra ta pulmakạut ‘e pā kạu ta, ka ne gou la ‘oaf ma ririạf ma kikia pō ‘e Jihova ‘Ạitu ‘otou a‘mạuriạg ‘eseat.” ‘E fạu te gou fạu 30! ‘Ạitu noa‘ia ‘e hanisi ma gou mäur ne‘ne‘ ma kikia.

‘Otou leugam se rȧnte‘ ‘e 29/5/1991, iạ terȧn noanoa pạut se gou ma ‘otou ö‘hön ta ‘e reko gou a‘sūum kikia ‘e Emergency Caeserean. Ka hanis ‘on ‘Ạitu va‘ön‘ȧk ma ‘ạmiạr mäur. Gou kat fak ra se läriri‘ ne
tore ‘e ‘otou fupfupu ka ‘e reko hanis ‘on ‘Ạitu, ‘otou ö‘hön ta matạ‘ ma ȧf‘ȧk gou ma ro‘ạit‘ȧk gou ‘e te‘ne terạni. Gou la‘ se “kindergarten” terȧn ‘eseat po‘e hȧn rē rak ta ‘ea la gou se hö‘hoi‘ạkiof po‘e lä‘riri‘ ne tore fea‘ia ‘e gou po‘e gou “hyper” ma kat ‘inea ra la manea‘ ma lä‘riri‘ ne tore. ‘Otou ö‘hön ta hoa‘ gou se rako te Brown Street ne mou se lä‘riri‘ special. Vȧh ‘e täe ma gou la‘ se Special school ta ‘e Salato Road.
Gou fạu häk ka gou kat ‘inea ra la fäeag ma ‘otou ö‘hön ta rak‘ȧk la gou la fäeag, hat puk ma hat pūk marag heta. ‘E av het ne gou ‘inea la fäeag ma sūi fäeag ma hȧn puer ne rak ta “suspend” gou ma gou hö‘ se ‘otou hanue ta ma ‘otou ö‘hön ta ta ‘otou hȧn re rāk ta. Gou rak la fä‘ tē ma hat Pūk Ha‘ heta. ‘Otou ö‘hön ta hoa‘ gou se rotū la po la gou la a‘fại se marag‘ȧk ne fäeag ‘on ‘Ạitu. Hạikạinagaga ma kakại rotū, lä‘riri‘ ne hat pūk sapatō ma rot haharȧg ta. Gou hạiasoag ‘e laloag ne ‘otomis kạunohoag ta se ‘otou ö‘rua ma ‘otou sạsiạg he rua. Gou hạiasoag se ‘otou ö‘hön ta ‘e hoa‘hoa‘ ne ‘otomiạr pūku se rotu ‘e “Churchward” ma pure‘ag ne “Caubati”.

Hanis ‘on ‘Ạitu ma gou ‘e te‘ne av ‘atakoa ma gou nā ‘otou mạuri se Jisu Karisto ka gou fạu 19 ka noh la‘mo ‘e hat pūk sapato. Gou nā ‘otou vahia la gou la rāk la fäeag Rotuạm; hat pūk marag Rotuạm heta; ro‘ạit Rotuạm ma suạ mak rot ‘e fäeg Rotuạm ta. ‘E av ma‘oi iạ noanoa pạu se ‘otou ö‘hön ta la muạ‘ạkia gou ‘e reko gou pa kat noh a‘fại ra ka ‘e reko ‘on hanisi se gou, iạ nā ‘on vahia la hạiasoag ma kikia gou.

Gou ‘uạ‘uạ‘ȧk se hanis ȧf‘ȧk ‘on ‘Ạitu ne va‘ön‘ȧk la gou la fupum ‘e laloag ne ta kạunohogat ne hanis ma ȧf‘ȧk, muạ‘ȧk ma matạ‘ gou ka rak‘ȧk fäeag ‘on ‘Ạitu. Se te‘ne ö‘ö‘ ne ma ‘omus lä‘riri‘ “special”, figalelei ma se masrag ‘e ‘omus lä‘riri‘i. Hanis, ȧf’ȧk, matạ‘ ma muạ‘ȧk iris ‘e fäeag ‘on ‘Ạitu. Lä‘riri‘i iạ tēfakhanis ‘on ‘Ạitu se laloag ne kạunohoga.

‘Ạitu la ạlạlum‘ȧk te‘ne ‘omus kạunohoag tūtū ‘atakoa.